विराटनगर। नेकपा एमाले कोशी प्रदेशको प्रथम अधिवेशनबाट घनश्याम खतिवडा अध्यक्ष निर्वाचित भएका छन्। 

प्रतिस्पर्धी विनोद ढकाललाई ८२ मतको अन्तरले पराजित गर्दै खतिवडा निर्वाचित भएका हुन्। खतिवडाले ५१२ मत प्राप्त गरे भने ढकालले ४३० मत पाए। खतिवडा मोरङको लेटाङ र ढकाल विराटनगर निवासी हुन्।

प्रदेश कमिटीको उपाध्यक्षमा धनकुटाका टीकाराम चेम्जोङ निर्विरोध निर्वाचित भएका छन्। उपाध्यक्षमा उनको एकल उम्मेदवारी थियो।

कमिटी सचिवमा पाँचथरका राजकुमार भण्डारी निर्वाचित भएका छन्। उनी ५२४ मत ल्याएर विजयी बने। उनका प्रतिस्पर्धी उदयपुरका शैलेश लामाले ३८१ मत प्राप्त गरे।

उपसचिवमा झापाकी जलवर्षा राजवंशी ६२८ मत र खोटाङका देवान राई ६१० मत ल्याएर निर्वाचित भए ।

अधिवेशनका लागि प्रदेशभरबाट ९९७ जना प्रतिनिधि छनोट भएर आएका थिए। तीनमध्ये ९७७ जना मतदानमा सहभागी भएको र २० जनाले मतदान नगरेको निर्वाचन कमिटीले जनाएको छ।(नेपाल न्यूज बैंक)