काठमाडौं। पूर्व परराष्ट्रमन्त्री तथा राष्ट्रिय सभा सदस्य विमला राई पौडेलले नेपालगञ्जका चेतन मानन्धरलाई नियन्त्रणमा लिई हत्या गर्ने रिगल भनिने योगराज ढकाललाई सरकारले आममाफी दिएको प्रति आक्रोस पोख्दै गृहमन्त्रीको जवाफ मागेकी छन्।

बिहीबार राष्ट्रिय सभा बैठकमा सांसद पौडेलले चेतनको हत्यारालाई सरकारले कानून संविधान मिचेर के आधारमा आममाफी दिन सिफारिस गरेको हो भन्नेबारे गृहमन्त्रीले सदनमा आएर जवाफ दिनुपर्ने माग गरिन्। 

उनले रिगललाई आममाफी दिएकोप्रति गृहमन्त्री र राष्ट्रपतिमाथि प्रश्न समेत गरिन्।

उनले भनिन्, “मान्छे मार्ने नाइकेलाई गृहमन्त्री र मन्त्रिपरिषद्ले कुन आधारमा कुन मापदण्ड र कुनचाहिँ आधारमा बसेर आममाफीको सिफारिस गर्नुभयो? आममाफीको मापदण्ड के हो? यो निर्णय कस्को आधारमा कस्को दबावमा के तरिकाले गरिएको हो त्यसको जवाफ गृहमन्त्रीले यहाँ उभिएर दिनुपर्छ यो मेरो माग हो।”

उनले जन्मकैदको सजाय पाएका हत्यारालाई आममाफी दिँदा पीडित परिवारसँग छलफल गर्र्नुपर्नेमा जोड दिदै थपिन्, “आम माफी दिने निर्णय गर्दा पीडितहरुसँग छलफल हुन्छ कि हुँदैन? पीडितको चित्त बुझाउनुपर्छ कि पर्दैन? पीडितलाई नसोधी उनीहरुको अनुमति बेगर दिनदाहाडै मान्छेको हत्या गरेको हत्यारालाई छोड्न मिल्छ?”

उनले प्रधानमन्त्री र गृहमन्त्री सशस्त्र द्वन्द्व गरेर आएको तर, राष्ट्रपति प्रजातानि्त्रक आन्दोलनबाट आएको व्यक्ति भएको भन्दै व्यङ्ग्य गर्दै भनिन्, “दुःखका साथ भन्नुपर्छ प्रधानमन्त्री र गृहमन्त्री हत्या हिंसाकै सशस्त्र द्वन्द्वको ब्याकग्राउण्डबाट आउनुभएको हो। यो भएर निदाउन सक्नुहुन्छ होला राष्ट्रपतिले कसरी सक्नुभयो ? यस्तो जघन्य अपराध गरेको मान्छेलाई आममाफी दिने कुरामा हस्ताक्षर गर्दा राष्ट्रपतिको हात काप्यो कि कापेन ?”(नेपाल न्यूज बैंक)