काठमाडौँ। सरकारले प्रधानमन्त्री तथा मन्त्रीहरूको एक महिनाको तलब बराबरको रकम भूकम्प पीडितलाई दिने निर्णय गरेको छ। 

बिहीबार बसेको मन्त्रिपरिषद् बैठकले जाजरकोट भूकम्पप्रभावित क्षेत्रमा सहयोगका लागि प्रधानमन्त्री राहत कोषमा प्रधानमन्त्री र मन्त्रीहरूको एक महिनाको तलब बराबर रकम दिने निर्णय गरेको सञ्चारमन्त्री रेखा शर्माले जानकारी दिइन्। 

उनले भनिन्, “प्रधानमन्त्री र सबै मन्त्रीहरुले भूकम्प पीडितहरुको लागि एक महिनाको पारिश्रमिक दिने भन्ने पहिलो निर्णय भएको छ।”

विकास निर्माणको सन्दर्भमा इन्धनमा लगाउँदै आएको पूर्वाधार शुल्कमध्ये प्रतिलिटर ५ रुपैयाँ बुढिगण्डकी जलविद्युत् आयोजनाका लागि उपलब्ध गराउने व्यवस्था गर्ने पनि निर्णय भएको उनले जानकारी दिइन्। 

उनले भनिन्, “विकास निर्माणको सन्दर्भमा इन्धनमा लगाइँदै आएको पूर्वाधार शुल्कमध्ये प्रतिलिटर ५ रुपैयाँ बुढिगण्डकी जलविद्युत् आयोजनाका लागि उपलब्ध गराउने व्यवस्था गराउने भन्ने पनि निर्णय भएको छ।”  (नेपाल न्यूज बैंक)