काठमाडौँ। नेपाली कांग्रेसका सांसद गगन थापाले एनसेल प्रकरणमा राजनीतिक र प्रशासनिक नेतृत्वको ठूलो साँठगाँठ रहेको आरोप लगाएका छन्। 

शुक्रबार बसेको राज्य व्यवस्था समितिको बैठकमा बोल्दै उनले एनसेलको सन्दर्भमा अहिले आएका कुरा रातारात नभएको भन्दै राजनीतिक र प्रशासनिक नेतृत्वको ठूलो साँठगाँठ तथा भरथेग नभइकन सो प्रकरण नभएको दाबी गरेका हुन्।

उनले भने, “एनसेलको सन्दर्भमा जे कुराहरु भएको छ यो अहिले रातारात भएको होइन। यसमा राजनीतिक र प्रशासनिक नेतृत्वको ठूलो साँठगाँठ, ठूलो भरथेग र ठूलो भरोसा नभइकन यो प्रकरण भएको छैन।”

उनले एनसेल प्रकरणको छानबिन गर्न सरकारले बनाएको समितिमाथि राज्य व्यवस्था समितिले नजिकबाट नियाल्नुपर्ने बताए।

उनले भने, “सरकारले बनाएको समितिले चोख्याउने वा कारबाही के गर्छ भनेर यो समितिले नजिकबाट नियाल्नुपर्छ।”(नेपाल न्यूज बैंक)