काठमाडौँ। तत्कालिन राजा बीरेन्द्रका सैनिक सचिब विवेक कुमार शाहको राजदरबार सम्बन्धी अर्को पुस्तक चाँडै सावैजनिक हुने भएको छ। शाहले यसअघि दरबारसँग सम्बन्धित एउटा पुस्तक प्रकाशन गरिसकेका छन्।

राजदरबार हत्याकाण्ड भएका बेला राजाको सैनिक सचिव रहेका शाहले पहिलो पुस्तकमा दरबारका अन्तरकथाको चर्चा गरेका छन्। चर्चामा रहेको त्यो पुस्तक मैले देखेको दरबारका लेखक, पूर्वसैनिक सचिव एवम् रथी शाहको नयाँ पुस्तक दरबारबाट देखेको नेपाल फागुन १२ गते शनिबार सार्वजनिक हुने भएको छ।

उनले यस पुस्तकमा राजदरबारमा विभिन्न ओहोदामा रहँदा, देखेका, सुनेका र अनुभूत गरेका विषयवस्तुलाई समावेश गरेका छन्। साथै, उनले आफ्नो अप्रत्याशित अवकाश र सेवामा रहँदाका केही महत्वपूर्ण सन्दर्भहरु समेत समेटेका छन्।

पहिलो पुस्तकमा दरबारभित्रका अनेकन रहस्य उदघाटन गरेका उनले यस पुस्तकमार्फत भने राजदरबारबाट बाहिर चियाउने प्रयास गरेका छन्। तीन राजा (महेन्द्र, वीरेन्द्र र ज्ञानेन्द्र) को राजकाज र कार्यशैलीलाई नजिकबाट नियालेका उनले पुस्तकमा तीन राजाका कार्यकालमा दरबारले देशलाई हेर्ने दृष्टिकोणबारे बताउने प्रयास गरेका छन्।

देशको भौगोलिक अवस्था, राजनीतिक, आर्थिक, प्रशासनिक र सामरिक फाँटका अनेक प्रसङ्ग उजागर गर्दै लेखक शाहले निश्चित परिधिमा रहेका मानिसबाहेक अरुले थाहा नपाएका जानकारीसमेत यस पुस्तकमार्फत सार्वजनिक गरेका छन्। सक्रिय राजतन्त्र हुँदा पञ्चायती व्यवस्थाका समर्थकले र संवैधानिक राजतन्त्र हुँदा जनप्रतिनिधिहरुले गर्ने क्रियाकलापलाई दरबारले कसरी हेर्थ्यो भन्ने प्रसङ्गहरु यस कृतिका चाखपरक पक्ष हुन्।

समग्रमा दरबार, राजनीतिक दल र तिनका नेताहरुबीचको शंका–स्वार्थहरुलाई यस पुस्तकमा सम्झनाका तरेलीमार्फत उतारिएको छ। नेपालको राजसंस्थाबारे जान्न चाहने स्वदेशी, विदेशी पाठकहरु र इतिहासका विद्यार्थीहरुलाई यस पुस्तकबाट केही जानकारी अवश्य मिल्नेछ भन्ने अपेक्षा राखेको लेखक शाहले बताएका छन्। अन्वेषक ठमनाथ घिमिरेले सम्पादन गरेका यो पुस्तक सांग्रिला मिडिया ग्रुपले प्रकाशन गरेको छ।(नेपाल न्यूज बैंक)