बेलायतका अनुसन्धानकर्ताहरूले कोभिडविरुद्ध खोपको बूस्टर मात्राले ओमिक्रोन भेरियन्टमा कस्तो प्रभाव पार्छ भनी गरेको विश्लेषणले गम्भीर बिरामी हुनबाट त्यस्तो मात्राले लगभग ८५ प्रतिशतसम्म जोगाउने देखाएको बताएका छन् । यस्तो सुरक्षा कोरोनाभाइरसका पहिलेका भेरियन्टका तुलनामा केही कम हो ।

यसको अर्थ खोपले अझै पनि कैयौँ मानिसहरूलाई अस्पतालसम्म पुग्नुपर्ने अवस्थाबाट रोक्नेछ । बिहीवार बेलायतमा हालसम्मकै उच्च ८ लाख ६१ हजार ३०६ मात्रा बूस्टर र तेस्रो मात्रा खोप दिइएकै बेला उक्त कुरा बाहिर आएको हो । इम्पेरिअल कलेज लन्डनको समूहले गरेको उक्त मोडलिङ ओमिक्रोन बारेका सीमित सूचनामा आधारित छ । तीव्र गतिमा फैलिइरहेको उक्त नयाँ भेरियन्टबारे वास्तविक अवस्थाका अझै धेरै सूचनाहरू सङ्कलन गर्नुअघि अहिले पनि उच्च तहको अनिश्चितता रहेको अनुसन्धानकर्ताहरूले बताएका छन् ।

विज्ञहरूले ओमिक्रोन भेरियन्ट कति गम्भीर हुन्छ वा हुँदैन भन्नेबारे पत्ता लगाउन कोसिस गरिरहेको जानकारी दिएका छन् । खोपहरूले हाम्रो शरीरलाई कोभिडविरुद्ध कसरी काम गर्ने भनेर सिकाउँछन् । तर अहिले उपलब्ध खोपहरू उच्च मात्रामा उत्परिवर्तित ओमिक्रोन भेरियन्टका लागि प्रयोग गर्ने हिसाबले बनाइएका होइनन्। त्यसैले गर्दा ती खोपहरू उक्त भाइरसका लागि ठ्याक्कै काम गर्ने खालका होइनन् ।

यसबाट बच्नका लागि बेलयती नागरिकलाई बुस्टर मात्रा खोप लगाउन सुझाइएको छ । त्यसले गर्दा मानिसहरूमा भाइरससँग लड्ने एन्टिबडीको तह उच्च हुनेछ । एन्टिबडीले भाइरसमा टाँसिएर उसलाई कोषहरूमा प्रवेश गर्न र भाइरसको मात्रा बढाउन रोक्नेछ । अध्ययनहरूले दुई मात्रा खोप लगाएका व्यक्तिहरूले भाइरसलाई बाहिर राख्ने एन्टिबडीको क्षमतामा २० देखि ४० प्रतिशतसम्म क्षमतामा कमी आएको देखाएका छन् ।

इम्पेरिअल समूहको प्रारम्भिक कामले ओमिक्रोनविरुद्ध खोपको प्रभावकारिता कम हुनसक्ने ठानेको छ । बूस्टर मात्राले पनि गम्भीर अवस्थाबाट बचाउने दर अन्य भेरियन्टका तुलनामा कम देखिएको छ । ओमिक्रोनमा यस्तो प्रभावकारिता ८० देखि ८५.९ प्रतिशत छ भने डेल्टालगायतका अन्यमा यस्तो प्रभावकारिता ९७ प्रतिशत रहेको छ ।

बेलायतमा अहिले पनि धेरै मात्रा डेल्टा भेरियन्ट नै देखिइरहेको छ । यद्यपि हाम्रो प्रतिरक्षा प्रणालीमा अन्य क्षेत्रहरू पनि छन् तिनले कोभिडविरुद्ध लडाइँ लड्छन् । त्यस्तोमा टी सेलहरू पनि हुन् ।

उक्त मोडलिङले टी सेलहरूमा पर्ने असरबारे चाहिँ अध्ययन गरेको छैन । इम्पेरिअलकी एक जना अनुसन्धानकर्ता आज्रा गनीले भनिन्, ‘एउटा अझै रहेको अनिश्चितता के हो भने ओमिक्रोन भेरिअन्टका कारण रोग कति गम्भीर हुन्छ भन्ने तुलना पुराना भेरिअन्टले बनाएको गम्भीर अवस्थासँग हुन्छ।’