वासिङ्टन। ठुलो सुरक्षा विफलताका लागि बढ्दो दबाबमा अमेरिकी सिक्रेट सर्भिसले सोमबार पूर्वराष्ट्रपति डोनाल्ड ट्रम्पमाथि एक सुटरले गोली चलाएपछि स्वतन्त्र समीक्षामा सहयोग गर्ने वाचा गरेको छ ।

अठहत्तर वर्षीय ट्रम्प शनिबार पेन्सल्भेनियामा एक चुनावी र्‍यालीमा हत्या प्रयासबाट बचे। उक्त निर्लज्ज आक्रमणले नोभेम्बरको मतदानअघि गहिरो ध्रुवीकरण भएको मुलुकलाई स्तब्ध बनाएको छ।

“के भयो, कसरी भयो र यस्ता प्रकारका घटना फेरि नदोहोरियोस् भनेर बुझ्न सिक्रेट सर्भिसले सबै सम्बन्धित सङ्घीय, राज्य र स्थानीय एजेन्सीसँग काम गरिरहेको छ”, सिक्रेट सर्भिसका निर्देशक किम्बर्ली चिटलले एक विज्ञप्तिमा भने, “हामी हिजो राष्ट्रपति जो बाइडेनले घोषणा गर्नुभएको स्वतन्त्र समीक्षाको महत्त्व बुझ्दछौँ र यसमा पूर्णरूपमा भाग लिनेछौँ, हामी कुनै पनि निरीक्षण कारवाहीमा उपयुक्त कांग्रेस समितिहरूसँग पनि काम गर्नेछौँ।”

पेन्सल्भेनियाको बटलरमा एउटा र्‍यालीमा बोल्दै गर्दा धेरै धमाकाको आवाज आएको थियो। ट्रम्पले आफ्नो कान समाते, उनको कान र गालामा रगत देखिन थाल्यो, फेरि उनि भुइँमा लडे। सिक्रेट सर्भिस एजेन्टहरूले पोडियममा आएपछि उनिलाई घेरे र नजिकैको गाडीमा लगे।

गोली चलाउने व्यक्ति र एक दर्शकको मृत्यु भयो। अन्य दुई दर्शक घाइते भए।

राष्ट्रपति बाइडेनले यो साताको र्यालीका साथै ट्रम्पलाई पार्टीको राष्ट्रपति पदको उम्मेदवारको ताज लगाइदिने मिलवाकी, विस्किन्सनमा रिपब्लिकन राष्ट्रिय सम्मेलनमा सुरक्षाको पूर्ण समीक्षाको आदेश दिए।

पृथ्वीको सबैभन्दा सुरक्षित राजनीतिक हस्तीमध्येका एकबाट करिब पाँच सय फिट (एक सय ५० मिटर) टाढा एउटा छतमा बन्दुकधारीलाई कसरी बस्न अनुमति दिइयो भन्नेबारे सिक्रेट सर्भिस बढ्दो दबाबमा छ।

मानिसहरूले बन्दुकधारीलाई छतमा देखिरहेको र गोली चलाउनुभन्दा अघि सुरक्षा चेतावनी दिन खोजिरहेको फोन फुटेजमा देखिएपछि प्रश्न अझ चर्को भयो।

ट्रम्प सोमबार सम्मेलनमा उपस्थित हुने सेट गरिएपछि चिटलले एजेन्सीले कार्यक्रममा सुरक्षालाई कडा बनाउन काम गरिरहेको बताए।

“सिक्रेट सर्भिसले नेसनल स्पेसल सिक्योरिटी इभेन्ट्स (एनएसएसई) को गतिशील सुरक्षा योजनाहरू डिजाइन गर्दछ जुन गतिशील सुरक्षा वातावरण र हाम्रा साझेदारहरूबाट सबैभन्दा ‘अप–टु–डेट’ खुफिया जानकारीको जवाफ दिन गतिशील हुनसक्छ”, उनले भने।

आइतबार सिक्रेट सर्भिसले सम्मेलनका लागि ‘पूर्णरूपमा तयार’ रहेको बताएको छ। रासस/एएफपी