काठमाडौँ। उत्तर-भारतको त्रिपुरा राज्यमा एचआईभी तीव्र गतिमा फैलिरहेको छ। त्रिपुरा स्टेट एड्स कन्ट्रोल सोसाइटी (TSACS) का अनुसार हालसम्म राज्यमा ८२८ विद्यार्थी एचआईभी संक्रमित भेटिएका छन् भने ४७ विद्यार्थीको मृत्यु भएको छ। ५७२ एचआईभी संक्रमित विद्यार्थीहरू अझै एचआईभी संक्रमणको साथ बाँचिरहेका छन् र तिनीहरूमध्ये धेरै उच्च शिक्षाको लागि त्रिपुरा बाहिर गएका छन्।

यद्यपि, त्रिपुराको स्वास्थ्य मन्त्रालयले ८२८ मामिला र ४७ जनाको मृत्युको तथ्यांक अप्रिल २००७ र मे २०२४ को बीचमा रहेको स्पष्ट गरेको छ।

संयुक्त राष्ट्रसंघले हालै सार्वजनिक गरेको तथ्यांकअनुसार विश्वभर करिब ४ करोड मानिस एचआइभी संक्रमित छन्। जसमध्ये ९० लाखभन्दा बढीले उपचार पाएका छैनन्। नतिजा भनेको हरेक मिनेट एड्सका कारण कसैको मृत्यु भइरहेको छ।

भारत सरकारको तथ्यांक अनुसार देशमा २३ लाखभन्दा बढी मानिस एचआईभी संक्रमित छन्। यसमा अधिकांश महाराष्ट्र, आन्ध्र प्रदेश, तमिलनाडु, कर्नाटक र तेलंगानाका छन्।

एचआईभीले हाम्रो शरीरको सेतो रक्त कोशिकाहरूलाई निशाना बनाउँछ, जसले गर्दा रोग प्रतिरोधात्मक क्षमता कमजोर हुन्छ। जसका कारण क्षयरोग, गम्भीर संक्रमण र क्यान्सरजस्ता रोगले सजिलै आक्रमण गर्न सक्छ। यो भाइरस एचआईभी संक्रमित व्यक्तिको रगत, स्तनको दूध, शुक्रकीट र जननांग (यौन अंग) तरल पदार्थबाट अर्को व्यक्तिमा फैलिन सक्छ। सन् २०२३ मा विश्वभर एचआइभीका कारण ६ लाख ३० हजार मानिसको मृत्यु भएको थियो।