ढाका। बंगलादेशमा आरक्षण विरोधी आन्दोलनले हिंसात्मक रुप लिएपछि प्रधानमन्त्री शेख हसिनाले सोमबार अगस्ट ५ मा राजीनामा दिएकी छन्। सेना प्रमुख जनरल वकार-उज-जमानले यसको पुष्टि गरेका छन्। उनले अब सेनाले अन्तरिम सरकार बनाउने बताए।

ढाकामा स्थिति नियन्त्रण बाहिर गएको छ। करिब ४ लाख मानिस सडकमा छन्। राजधानीका विभिन्न स्थानमा तोडफोड भइरहेको छ। प्रधानमन्त्री शेख हसिना प्रधानमन्त्री निवासबाट निस्किएकी छन्। समाचार एजेन्सी एएफपीले स्रोतलाई उद्धृत गर्दै प्रधानमन्त्री ढाका छाडेर सुरक्षित स्थानमा सरेको जनाएको छ। उनकी बहिनी रेहाना पनि उनीसँगै छिन्।

यसै क्रममा हसिना सैन्य हेलिकप्टरबाट भारत पुगेकी केही मिडिया रिपोर्टमा दाबी गरिएको छ। उनी पश्चिम बंगालमा रहेको खबर छ। तर, यो पुष्टि हुन सकेको छैन।