काठमाडौँ। पाकिस्तानको स्वतन्त्रता दिवसअघि बलुचिस्तान प्रान्तमा मङ्गलबार आतंकवादीहरूले ग्रेनेड आक्रमण गरेका छन्। जसमा ३ जनाको मृत्यु भएको छ। साथै ६ जना घाइते भएका छन्। बलुचिस्तानको राजधानी क्वेटाको लियाकत बजारमा झण्डा बेच्ने एक पसलमा यो हमला गरिएको थियो।

पाकिस्तानी पत्रिका द न्युज इन्टरनेशनलका अनुसार बलोच लिबरेशन आर्मी (बीएलए) ले आक्रमणको जिम्मेवारी लिएको छ। बीएलएले भने कि उनीहरूले क्षेत्रका पसलहरूलाई झण्डा बेच्न निषेध गरेका थिए। पसलले नसुन्दा बम प्रहार भएको थियो।

लियाकत बजार क्वेटाको सबैभन्दा व्यस्त सडकहरू मध्ये एक हो। आक्रमणको समयमा यहाँ धेरै भीड थियो। पाकिस्तानमा बुधबार ७८औँ स्वतन्त्रता दिवस मनाइँदैछ। बीएलएले जनतालाई १४ अगस्टमा बिदा नमनाउन आग्रह गरेको छ। यसैबीच सरकारी अस्पतालका प्रवक्ता वसीम बेगले अस्पतालमा ६ घाइते र तीन जनाको शव आइपुगेको बताए।

यसअघि पनि हमला भएका थिए, धेरै पसलले झण्डा बेच्न छाडेका थिए। पाकिस्तानी अखबार डेली टाइम्सका अनुसार हालैका वर्षहरूमा बलुचिस्तानमा स्वतन्त्रता दिवसमा आक्रमणका घटनाहरू बढेका छन्। लडाकुले राष्ट्रिय झण्डा बेच्ने पसल र पसलेलाई निशाना बनाएका छन्। जसका कारण धेरै पसले व्यवसाय छाड्न बाध्य भएका छन्। सन् २०२२ र २०२३ मा पनि पाकिस्तानी झण्डा बेच्ने मानिसहरूमाथि आक्रमण भएको थियो।

बलुचिस्तान प्रान्तीय गृह र जनजातीय मामिला मन्त्री मिर जिया उल्लाह लांगोभले सरकारले स्वतन्त्रता दिवसको उत्सवको लागि कडा सुरक्षा व्यवस्था गरेको बताए। उनले राष्ट्रिय पर्वको दिन घरबाहिर निस्कन सर्वसाधारणलाई आग्रह गरेका छन्। कसैलाई धम्की दिने डर लागेमा प्रहरीलाई खबर गर्नुपर्ने उनले बताए।