काठमाडौं । गृहमन्त्री रमेश लेखकले पूर्वराजा ज्ञानेन्द्र शाहलाई  नहौसिन सुझाएका छन् । उनले अरुको उक्साहटमा पूर्व राजाले हौसिन आवश्यक नरहेको पनि बताएका छन्।

सुर्खेत पुगेका गृहमन्त्री लेखकले आज सम्वाददाताहरुसँग भने, ‘केही मानिसहरूले गणतन्त्रको विकल्प राजतन्त्र हुन्छ भनेर जुन भ्रम फैलाइरहेका छन्, त्यो भ्रमले राजा पनि हौसिन आवश्यक छैन।’

मन्त्री लेखकले जनआन्दोलन र क्रान्तिबाट फालिएको राजसंस्थाका राजा त्यही देशमा संविधानले उपलव्ध गराएका सबै स्वतन्त्रता उपभोग गरेर बसेको कमै देखिने पनि उल्लेख गर्दै भने, ‘हाम्रो लोकतन्त्र उदार छ, जनताले फालिसकेको राजसंस्थाका राजा पनि सबै स्वतन्ता र अधिकारलाई उपभोग गरेर बसिरहनु भएको छ, त्यो हो लोकतन्त्रको सुन्दरता भनेको। यसलाई लोकतन्त्रको कमजोरीका रूपमा कसैले पनि नलिओस्,।’

केही साता पोखरा मुकाम बनाएर विभिन्न धार्मिकस्थलको भ्रमण गर्दै आफ्नो सक्रियता प्रदर्शन गरिरहेका पूर्व राजा शाहलाई राष्ट्रिय प्रजातन्त्र पार्टी लगायत सक्रिय राजतन्त्र पक्षधर व्यक्ति र संस्थाहरुले गणतन्त्रको विकल्पका रुपमा उक्साईरहेको देखिएको छ। आज काठमाडौंमा राप्रपाका दुइ समूह सहितको प्रदर्शन आयोजना गरिएको छ।