विहीबार, २० चैत्र २०८१
काठमाडौं । तीन महिना अवधि पनि बित्न नपाउँदै सिंचाई विभागका महानिर्देशक फेरेर मन्त्रीले अर्को कीर्तिमान बनाएका छन् ।
ऊर्जा, जलस्रोत तथा सिंचाई मन्त्री दीपक खड्काले तीन महिनामै सिंचाई विभागका महानिर्देशक फेरेर यस्तो कीर्तिमान बनाएका हुन् ।
मन्त्री खड्काले गत मंसिर १८ गते सहसचिव देवराज निरौलालाई विभागको महानिर्देशक बनाएर सञ्जीव बराललाई मन्त्रालयको ‘कोरिडोर’ मा थन्क्याएका थिए । मंगलबार तिनै बराललाई विभागको महानिर्देशकमा नियुक्त गरिएको छ ।
बराललाई माओवादी नेता तथा सिंचाई मन्त्री शक्तिबहादुर बस्नेतले महानिर्देशक बनाएका थिए । कांग्रेस–माओवादी गठबन्धन सरकार भएका बखत चूर्णबहादुर ओलीलाई सिंचाई विभागको महानिर्देशक बनाइएको थियो । ओलीलाई हटाउर उनै बस्नेतले बराललाई जिम्मेवारी सुम्पेका थिए ।
बराललाई पनि हटाएर अहिलेका मन्त्री खड्काले निरौलालाई बनाएका थिए । अहिले तीन महिनाकै अवधिमा निरौलालाई हटाएर बराललाई ल्याएका हुन् । निरौलालाई भने जिम्मेवारीबिनाको मन्त्रालयको उही कोरिडोरमा तानिएको छ ।
बरालले मंगलबार नै पदको जिम्मेवारी सम्हालिसकेका छन् भने निरौला विभागबाट बिदावारी भएका छन् । विभाग सूत्रका अनुसार निरौलाई हटाउनुको मुख्य कारण भने सिक्टा र रानी जमरा सिंचाई आयोजनाको ठेक्का हो । यी दुई आयोजना (राष्ट्रिय गौरव) को यसपालि नयाँ ठेक्का लाग्दैछ ।
मन्त्रीको सरुवा आतंकले सिंचाईं विभागका कर्मचारीहरुको मनोबल खस्किएको कर्मचारीहरु बताउँछन् ।
प्रतिक्रिया