काठमाडौं। घिमिरे बन्धु राष्ट्रिय प्रतिष्ठान, नेपालले नयाँ वर्ष २०८२ को पहिलो दिन देखि श्रीमद्भागवत सप्ताह ज्ञान महायज्ञ तथा राष्ट्रिय धार्मिक महामहोत्सव आयोजना गर्ने भएको छ। महायज्ञ अवधिभर श्रध्दालुजनबाट अर्पित दान दातव्य र आर्थिक सहयोगबाट प्रतिष्ठानले संस्थागत पूर्वाधार निर्माण गरी विभिन्न कल्याणकारी कार्य गर्ने लक्ष्य राखेको छ।

प्रतिष्ठानले सनातन पध्दतिको जगेर्ना गर्न धार्मिक कार्य गर्दै आध्यात्मिक चेतना प्रवर्धन गर्ने, घिमिरे बन्धु राष्ट्रिय प्रतिष्ठानका लागि काठमाडौं उपत्यकाभित्र जमीनको व्यवस्था मिलाई प्रतिष्ठानका लागि भवन निर्माण गर्ने, प्रतिष्ठानको परिसरभित्र विभिन्न कल्याणकारी कार्य गर्ने, अध्ययन, अनुसन्धान कार्य गर्न संग्रहालय, पुस्तकालय, वाचनालय, प्रविधि सिकाई स्थल स्थापना गर्ने जस्ता कार्य गर्ने लक्ष्य राखिएको प्रतिष्ठानका निवर्तमान सचिव तथा वर्तमान सदस्य अजय घिमिरेले जानकारी दिएका छन्।

त्यसैगरी योग ध्यान र रक्तदान सेवा नियमित संचालन गर्ने, बन्धुमिलन, अन्तरसम्वाद तथा अन्य समुदायसँग पनि अन्तरक्रिया अगाडि बढाउन भवन परिसरभित्र बन्ने सभा कक्ष निर्माण गर्ने, गरीव जेहेन्दार विद्यार्थीका लागि छात्रवृत्तिको व्यवस्था गर्न अक्षयकोष स्थापना गर्ने प्रतिष्ठानको लक्ष्य रहेको सदस्य घिमिरे जानकारी दिए।

विशेष कार्यक्रम

यसैगरी महामहोत्सवमा ग्रहशान्ति, तुलादान, रुद्राभिषेक, ब्राम्हणभोजन, प्रसाद वितरण, ब्रतबन्ध र चौरासीपूजा जस्ता विशेष कार्यक्रम समेत समावेश गरिएको छ।

यस्तै सामाजिक उदेश्यका निमित्त सप्ताह महयज्ञ आयोजना गरिएको बताईएको छ। सप्ताह महायज्ञको कार्यक्रम अनुसार, पहिलो दिन शोभा शान्ति कलश यात्रा, समुद्घाटन र पूर्वांग हुने छ । दोस्रो दिन देखि ८ गतेसम्म नियमित पूजापाठ, पाठपारायण, कथावाचन, भागवत विसर्जन, तिलअर्पण तथा साँझ दीप प्रज्वलन हुने भने ९ गते पूर्णाहुति गरी महायज्ञको समापन हुने जनाईएको छ।