काठमाडौं । राष्ट्रिय प्रजातन्त्र पार्टीका सांसद दीपक बहादुर सिंहले नयाँ नयाँ भ्रष्टाचार काण्डहरुले देश अस्तव्यस्त अवस्थामा गैइरहेको बताएका छन् ।

सोमबार प्रतिनिधिसभाको बैठकमा बोल्दै उनले पोखरा अन्तर्राष्ट्रिय विमानस्थल, भैरहवा अन्तर्राष्ट्रिय विमानस्थलको भ्रष्टाचारको कथा बजारमा छर्लङ आइराखेको बताएका हुन् । उनले भने, ‘देश अस्तव्यस्त अवस्थामा छ । एक महिना हुन लागिसक्यो  शिक्षक आन्दोलन, मिटरव्याजी आन्दोलन, सहकारी पीडित आन्दोलन, डाक्टरहरुको  आन्दोलन र कर्मचारीहरुको  पनि तयारी हुन गैइराखेको छ । नयाँ नयाँ भ्रष्टाचार काण्ड आइराखेको छ ।  पोखरा अन्तर्राष्ट्रिय विमानस्थल, भैरहवा अन्तर्राष्ट्रिय विमानस्थलको पर्मलोडको कथा बजारमा छर्लङ आइराखेको छ ।’ साथै, उनले भ्रष्टाचार काण्डहरु ओझेलमा पार्नको लागि यो सरकारले राजावादीहरुले अस्थिरता ल्यायो देशमा  भनेर  आरोप लगाइरहेको बताए । उनले सदनमै पनि  राजावादीहरुलाई फोड्नुपर्छ, जेलमा हाल्नुपर्छ भन्ने अभिव्यक्ति आएको समेत बताए ।

उनले भने, ‘भ्रष्टाचारका यी काण्डहरु ओझेलमा पार्नको लागि अब सरकारले राजावादीहरुले अस्थिरता ल्यायो देशमा भनिकन यही सदनमा पनि यी राजावादीहरुलाई फोड्नुपर्छ, जेलमा हाल्नुपर्छ भन्ने अभिव्यक्ति आएको  छ । हो हामी राजा चाहिन्छ यो  देशमा  भन्ने पार्टीका मान्छे हौं । यदी हामीबाट कुनै कमिकमजोरी भएको छ भने कारवाहीको सजाय भोग्न हामी तयार छौं ।  यदी देशको  उन्नती र प्रगती गर्न यी भ्रष्टाचारीहरुलाई छिनोफानो गर्नुपर्ने छ ।’