काठमाडौं– स्पिनर महेश थिक्सनाको सानदार बलिङमा चेन्नई सुपर किंग्सले इन्डियन प्रिमियर लिग (आईपीएल) २०२२ मा रोयल च्यालेन्जर्स बेंग्लोरलाई २३ रनले हराउँदै पहिलो जित हात पारेको छ।

२ सय १७ रनको विशाल विजयी लक्ष्य पछ्याएको बेंग्लोरले निर्धारित २० ओभरमा ९ विकेट गुमाउँदै १ सय ९३ रन बनायो। बेंग्लोरका शहबाज अहमदले २७ बलमा ४ चौकासहित सर्वाधिक ४१ रन बनाए। डेब्यू खेल खेलेका सुयश प्रभुदेशाईंले १८ बलमा ५ चौका र १ छक्कासहित ३४ रन बनाए।

 दिनेश कार्तिकले ३४, ग्लेन म्याक्सवेलले २६ तथा अनुज रावतले १३ रन बनाए। मोहमद सिराज १४ रनमा अविजित रहे। चेन्नईका स्पिनर थिक्सनाले ४ ओभरमा ३४ रन खर्चेर ४ विकेट लिए। रविन्द्र जडेजाले ४ ओभरमा ३९ रन खर्चेर ३ विकेट लिए। मुकेश चौधरी र ड्वेन ब्राभोले समान १–१ विकेट लिए।

त्यसअघि डिवाई पाटिल स्पोर्ट्स एकेडेमी मुम्बईमा टस हारेर ब्याटिङको निम्तो पाएको चेन्नईले निर्धारित २० ओभरमा ४ विकेट गुमाउँदै २ सय १६ रन बनाएको थियो। चेन्नईका रोबिन उथप्पाले ८८ रनको उत्कृष्ट प्रदर्शन गरे। उनले ५० बलमा ४ चौका र ९ छक्का प्रहार गरे।

शिवम दुबेले ४६ बलमा ५ चौका र ८ छक्कासहित ९५ रनमा अविजित रहे। तेस्रो विकेटका लागि उथप्पा र दुवेले ७४ बलमा १ सय ६५ सानदार कीर्तिमानी शतकीय साझेदारी गर्दै विशाल योगफलमा पुर्याएका थिए।

रुतुराज गायकवाडले १७ रन बनाए। मोइन अली ३ रनमा आउट हुँदा कप्तान रविन्द्र जडेजा शून्यमा पेभेलियन फर्किए।

बेंग्लोरका वानिन्दु हसरंगाले सर्वाधिक २ विकेट लिए। जोश हाजलउडले १ विकेट लिए। चेन्नईले यसअघि चारै खेलमा पराजित भएको थियो। चेन्नईले अब आइतबार गुजरात टाइटन्ससँग खेल्नेछ। बेंग्लोरको यो पाँचौं खेलमा दोस्रो हार हो। बेंग्लोरले शनिबार दिल्ली क्यापिटल्ससँग खेल्नेछ।