काठमाडौं। भ्रमणकारी युगान्डाविरूद्धको पाँचौ तथा अन्तिम टि–२० क्रिकेट शृंखलामा घरेलु टोली नेपालले सानदार जित हात पारेको छ। शनिबार सम्पन्न खेलमा नेपालले युगान्डालाई ३४ रनले पराजित गरेको हो। यो जितसँगै ५ टि–२० शृंखलामा युगान्डा ३–२ ले विजयी भएको छ। नेपालले २ जित र ३ हारसहित सिरिजको अन्त्य गरेको छ। 

जितको लागि १ सय २४ रनको विजयी लक्ष्य पछ्याएको युगान्डाले निर्धारित २० ओभरमा ६ विकेट गुमाउँदै ९० रन मात्र बनायो। युगान्डाकी रिता मुसामालीले सर्वाधिक २६ रन बनाइन्। उनले ३८ बलमा रन बनाएकी हुन्।

केभिन एविनोले २२ बलमा १ चौकासहित १५ रन बनाइन्। सकिरा सडिक १७ बलमा १ छक्कासहित १३ रनमा अविजित रहिन्। जेनेत म्बावाजीले १० रन जोड्दा युगान्डाका अन्य ब्याटरले दोहोरो अंक छुन सकेनन्।

नेपालका लागि इन्दु बर्मा र सीता रानामगरले २–२ विकेट लिए। अस्मिना कर्माचार्य र हिरान्माये रोयले १–१ विकेट बाँडे। 

त्यसअघि कीर्तिपुरस्थित टियु क्रिकेट मैदानमा टस हारेर ब्याटिङमा उत्रिएको नेपालले निर्धारित २० ओभरमा ६ विकेट गुमाएर १ सय २३ रन बनाएको थियो। 

नेपालका लागि ज्योति पाण्डेले सर्वाधिक ४९ रन बनाइन्। उनले ४१ बलमा ३ चौका प्रहार गरिन्। कविता जोशी १५ बलमा २ चौका र १ छक्कासहित १८ रनमा अविजित रहिन्। सिताराना मगर १७ रनमा आउट हुँदा अप्सरी बेगमले ११ रन जोडिन्। 

नेपालकी कप्तान रुविना क्षेत्री र डोली भट्ट दुवै शून्य रनमा पोविलियन फर्किए। इन्दु बर्माले ८ रन जोडिन्।

युगान्डाकी कोन्सी एविको र फिओना कुलुमेले १–१ विकेट बाँडे। युगान्डाले लगातार ३ खेलमा जित निकाल्दै दुई खेल अगावै सिरिज जितिसकेको थियो। 

नेपालले युगान्डाविरूद्धको पहिलो खेलमा १२ रनले गुमाएको थियो भने दोस्रो खेलमा एक विकेटको पराजय ब्यहोरेको थियो। तेस्रो खेलमा नेपालले ६ विकेटको हार ब्यहोरेको थियो भने चौथो खेलमा युगान्डालाई १५ रनले हराएको थियो।