काठमाडौं । निर्देशक नवीन सुब्बा नेपाली चलचित्रको बगैचामा तेश्रो सुन्दर फूल फुलाउँदैछन् । त्यो हो, उनको नयाँ चलचित्र ‘गाउँ आएको बाटो ।’

पहिलो चलचित्र ‘नुमाफुङ’ बाट  चर्चा बटुलेका नविन निकै कम चलचित्र निर्देशन गर्छन् । उनको दोस्रो चलचित्र ‘गुडबाई काठमाडौं’ले पनि अन्र्तराष्ट्रिय चलचित्र महोत्सवहरुमा पुरस्कार जित्यो । पहिलो चलचित्र निर्देशनको करीब दुइ दशकको अन्तरालमा अब आउँदैछ, ‘गाउँ आएको बाटो’ ।

नविनले मंगलबार राजधानीमा आयोजित पत्रकार सम्मेलनमा चलचित्र निर्माणको घोषणा गरे । राई समुदायका बारेमा बनाइने यो चलचित्रको कथा महेश राई र नवीन सुब्बाले लेखेका छन् । निर्माता आमोद राई हुन्, जो हङकङमा शिक्षण पेशामा छन् । छायाँकन मार्किन कापरोनले गर्दैछन्, जो अमेरिकाबाट आएका हुन् ।  

चलचित्रमा दयाहाङ राई र पशुपति राई मुख्य भूमिकामा रहनेछन् । पर्सन राई, खानुमा राई, केशव राई, प्रमिशा राई, प्रेम सुब्बा लगायतका कलाकार यसमा अनुबन्धित छन् । 

‘चाँडै नै छायांकन सुरु हुनेछ । हामी भोजपुरको ग्रामीण भेगतिर जाँदैछौं’, सुब्बाले भने । 

मौलिक, प्रतिस्पर्धी र गुणात्मक चलचित्र बनाउनुपर्ने, अन्यथा नेपाली चलचित्रको कुनै पहिचान स्थापित नहुने सुब्बाले बताए । 

‘चलचित्र यस्तो होस्, जुन अन्तर्राष्ट्रिय बजारमा प्रतिस्पर्धा गर्नसकोस्’, सुब्बाले भने, ‘हिजोकै जस्तो चलचित्र बनाएर अब दर्शकले मनपराउनेवाला छैनन् ।’

अभिनेता दयाहाङ राई पनि निर्देशक सुब्बासँग काम गर्न पाउँदा प्रसन्न छन् ।  दयाहाङले धेरै पहिले नविन सुब्बाकै निर्देशनमा बनेको टेलिचलचित्र ‘दलन’मा काम गरेका थिए । ‘गाउँ आएको बाटो’मा काम गर्न पाउँदा एकदमै खुशी लागेको उनले बताए । ‘यो मेरो लागि अवसर र चुनौती दुवै हो’, उनले भने । 

अभिनेत्री पशुपति राई पनि निर्देशक सुब्बासँग काम गर्न पाउँदा मख्ख छिन् । निर्माता तथा निर्देशक छिरिङरितार शेर्पाले निर्माण टिमलाई शुभकामना दिएका थिए ।