काठमाडौं– साउदी अरबको आधिकारिक समाचार एजेन्सी एसपीएले मंगलबार विश्वभरबाट एक लाख ७२ हजार ५६२ तीर्थयात्री मदिना पुगेको जानकारी दिएको छ।

हज तथा उमराह मन्त्रालयले मदिना आउने र फर्कनेहरुको तथ्याङ्क सार्वजनिक गरेको छ। यी तथ्याङ्कका अनुसार राजकुमार मोहम्मद बिन अब्दुलअजीज अन्तर्राष्ट्रिय विमानस्थलबाट करिब १ लाख ५६ हजार ८२८ जना मदिना पुगेका थिए।

भूमि अध्यागमन केन्द्रमा १३ हजार ९७ जना मदिना पुगेका छन्। यो आँकडाले मदिनामा बस्ने तीर्थयात्रीहरूको राष्ट्रियता पनि बताउँछ। जसमा इन्डोनेसियाबाट मदिना पुगेका तीर्थयात्रीको संख्या सबैभन्दा बढी (२४ हजार ४७८) रहेको छ। यसबाहेक भारत, बंगलादेश, इराक र इरानका हज यात्रीहरू पनि सामेल छन्।

यस महिनाको सुरुमा साउदीले कोरोना महामारी पछि लगाइएको प्रतिबन्धहरू पछि तीर्थयात्रीहरूको पहिलो समूहलाई स्वागत गरेको हो। हज यात्रीहरूका लागि कोरोना संक्रमणको सन्दर्भमा जारी गरिएको ग्लोबल हेल्थ गाइडलाइन्सको कडाईका साथ पालना भइरहेको छ।

देशको हज मन्त्रालयका मोहम्मद अल बिजावीले एक च्यानलसँगको कुराकानीमा भने– आज हामीले यस वर्षको पहिलो समूह इन्डोनेसियाबाट आएका तीर्थयात्रीहरूलाई स्वागत गरेका छौं। भारत र मलेसिया लगायतका देशबाट पनि विमान आउने क्रम जारी रहनेछ।

सन् २०१९ मा विश्वको यो सबैभन्दा ठूलो तीर्थयात्रामा करिब २५ लाख मानिसले भाग लिएका थिए। कोरोना महामारीका कारण सन् २०२० मा विभिन्न प्रतिबन्ध लगाएर तीर्थयात्रीको संख्या सीमित गरिएको थियो।