काठमाडौँ, ८ कात्तिक: गाई तिहारको अवसर पारेर असहाय गाईबाच्छा संरक्षण अभियानको स्थायित्वका लागि अक्षयकोष स्थापना गरिएको छ । कागेश्वरी मनोहरा नगरपालिका–८ गोठाटारस्थित पशुपति क्षेत्र विकास कोषले उपलब्ध गराएको करिब एक सय रोपनी जग्गामा अभियानले सडकमा छाडा छोडिएका दुई सय १७ गाई संरक्षण गरेर राखेको छ । गाई तिहारका अवसरमा आज बिहान गाई पूजा गर्न आयोजित कार्यक्रममा ३० जनाले अभियानको आजीवन सदस्यता लिएको अभियानका संयोजक उत्तम पुडासैनीले राससलाई जानकारी दिनुभयो ।
  
अभियानले असहाय गाईबाच्छा संरक्षणमा सहयोग जुटाउन एक महिने अभियान सुरु गरेको जनाएको छ । यस क्रममा दुई सय जनालाई सदस्य बनाउने लक्ष्य राखिएको छ । आजीवन सदस्यको शुल्क रु पाँच हजार तोकिएको छ । आज ३० जना आजीवन सदस्यबाट रु एक लाख ५० हजार र देउसीभैलोबाट रु ७१ हजार चार सय ३३ सहयोग जुटेको छ । यसैगरी अक्षयकोषका लागि अरु सहयोगीबाट पनि सहयोग आउने क्रम चलिरहेको जनाइएको छ ।

  अक्षय कोषमा कागेश्वरी मनोहरा नगरपालिकास्थित मूलपानी निवासी मुरारी फँुयालबाट रु एकलाख २५ हजार प्राप्त भएको छ । समाजसेवी दीपकसिंह भण्डारी र श्रीमती सगुन भण्डारीबाट आफ्ना स्व माता यज्ञकुमारी भण्डारी र स्व बुबा क्याप्टेन टुङ्नरसिंह भण्डारीको स्मृतिमा रु एक लाख एक हजार प्राप्त भएको पनि अभियानले जनाएको छ ।  
  व्यवसायी अच्युत बराल र सामाजिक अभियानकर्मी रामकृष्ण बरालबाट आफ्ना स्व पिता भूमिप्रसाद बराल र स्व आमा जोगमाया बरालको स्मृतिमा रु ५० हजार सहयोग जुटेको छ । 

    अक्षयकोषका लागि बौद्ध निवासी महेश पुडासैनीबाट आफ्ना स्व पिता शिरसागर पुडासैनीको स्मृतिमा रु १५ हजार, डा लक्ष्मण अर्यालबाट रु १० हजार, आफ्नो स्व पिता पद्मबहादुर बोहोराको स्मृतिमा भूपेन्द्र बोहोराबाट रु १० हजार, विजय सुवेदीबाट रु १० हजार, गोपाल रिजालबाट रु १० हजार, बुबा पशुपति दाहालका लागि छोरा मधुसुदन दाहाल र छोरी विनिता दाहालबाट रु १० हजार, कालोपुल निवासी सामाजिक अभियानकर्मी सुशील कोइरालाबाट रु १० हजार र दीपक रिसालबाट रु १० हजार प्राप्त भएको अभियानले जनाएको छ । (रासस)