काठमाडौं। विपन्न, असहाय, बेवारिसे बिरामीका लागि कुल शैय्याको १० प्रतिशत शय्या छुट्याइ निःशुल्क उपचार गर्ने व्यवस्था कार्यान्वयन नगर्ने अस्पतालहरूलाई काठमाडौं महानगरपालिकाले कार्वाही गर्ने चेतावनी दिएको छ। 

महानगरपालिकाका मेयर बालेन्द्र साहले आज आइतबार आफ्नो सामाजीक सञ्जारमा ऐन नियम समेत उल्लेख गर्दै महानगरभित्रका स्वास्थ्य संस्थाहरुलाई ती सेवा कार्य इमान्दारीपूर्वक गर्न सल्लाह दिँदै नगरेको पाइएमा काठमाडौँ महानगर पालिकाबाट नियमानुसार कारबाही हुने चेतावनी दिएका हुन्।

साथै उनले उपलब्ध गराएको सेवाको सूचना प्रत्येक महिनाको १० गतेभित्र टाँस्न अस्पतालहरूलाई निर्देशन दिएका छन्।

मेयर साहले अस्पतालहरूले प्रचलित कानुन–मापदण्ड अनुसार लक्षित वर्गहरूलाई निःशुल्क स्वास्थ्य सेवा उपलब्ध गराउन, सेवाग्राहीमैत्री सेवा प्रवाह गर्न, स्वास्थ्य संस्थाहरूमा कार्यरत स्वास्थ्यकर्मी र अन्य कर्मचारीहरूको प्रचलित कानुनले तोकेको न्यूनतम पारिश्रमिक उपलब्ध गराउन पनि निर्देशन दिए।

स्वास्थ्यजन्य फोहोरमैला व्यवस्थापन गर्ने, अस्पतालभित्र रहेका क्यान्टिनमा खाद्य गुणस्तर कायम गर्ने, अनावश्यक प्रयोगशाला परीक्षणको लागि सिफारिस नगर्ने जस्ता कार्यहरू सुधार गरी स्वास्थ्य सेवालाई सबै वर्ग, समूहको पहुँचयोग्य बनाउन उनको निर्देशन छ।